وفاقی وزیر داخلہ رانا ثناء اللّٰہ نے کہا ہے کہ اگر ہر قیمت پر عمران خان کو گرفتار کرنا ہوتا تو وہ برگر رکاوٹ نہیں بن سکتے تھے جو انہوں نے بٹھائے ہوئے ہیں۔
فیصل آباد کی زرعی یونیورسٹی میں جشن بہاراں کے موقع پر میڈیا سے گفتگو کرتے ہوئے رانا ثنا اللّٰہ نے کہا ہے کہ عمران خان پر قاتلانہ حملے کا کوئی معاملہ نہیں ہے، ان پر پہلے بھی قاتلانہ حملے کی کہانی جھوٹ ہے۔
انہوں نے کہا کہ عمران خان عدالت میں پیش نہ ہونے اور سزا سے بچنے کے لیے بہانے کر رہے ہیں، گرفتاری کی کوشش کی وجہ سے وہ عدالت پیش نہیں ہو رہے، ان پر توشہ خانہ کی فرد جرم لگنی ہے، ان کو پتہ ہے پیش ہوں گا تو فرد جرم لگنی ہے۔
انہوں نے کہا کہ پولیس عدالت کا آرڈر لے کر زمان پارک پہنچی ہے، پولیس عدالتی حکم کی تعمیل کو پورا کرنے کے لیے زمان پارک آئی ہے، عدالت کو صورتِ حال سے آگاہ کیا جائے گا، عمران خان کی گرفتاری کے لیے پولیس آئی ہے، ان کا الزام ہی بنیادی طور پر غلط ہے، وہ عدالتوں میں پیش نہ ہونے کے بہانے ڈھونڈ رہے ہیں۔
وزیر داخلہ کا کہنا ہے کہ الیکشن میں توسیع کے لیے ترمیم کی ضرورت نہیں، سیاسی جماعتیں تو الیکشن کرانے کی ذمےدار نہیں، ہم الیکشن لڑنے کے لیے تیار ہیں، ن لیگ الیکشن کے لیے پوری طرح تیار ہے، بنیادی مؤقف ہے کہ ملک کی بہتری کے لیے الیکشن ہوں، الیکشن عمران خان کی ضد کی وجہ سے نہیں ہونا چاہیے۔
ان کا یہ بھی کہنا ہے کہ کھیل کے میدان آباد ہوں گے تو حوصلے بلند ہوں گے، کبڈی پنجاب کا روایتی کھیل ہے، ایسےکھیلوں کو پزیرائی ملنی چاہیے۔
